Op Woensdag 28 April 2010 het "Calabash" , 'n kleinsake onderneming naby
Grootdrink, die laaste van sy bestellings afgehandel vir die voorsiening van
kalbasse en kalbasprodukte aan die Johannesburgse maatskappy, Topturf, wat
op sy beurt verantwoordelik is vir die dekor by al die sokker stadions
tydens die Wêreldbeker-Sokkertoernooi.
Die losies by die verskillende stadions gaan die verskillende Suid
Afrikaanse kulture uitbeeld. Voorleggings deur Topturf was verlede jaar aan
Fifa gedoen en elke tema moes deur 'n paneel goedgekeur word. Aangesien
kalbasse so 'n integrale deel van die Afrika kultuur uitmaak, moes
"Calabash" altesaam 2650 kalbasse en 3000 kalbasvase vir hierdie doel
voorsien.
Vir baie lesers mag die bestelling klein en onbelangrik voorkom, maar in die
moeilike ekonomiese omstandighede waarin die wêreld tans vasgevang is, het
hierdie bestelling vanaf Topturf werk en 'n inkomste vir baie vroue van
Topline en Grootdrink (Tussen Upington en Groblershoop) verseker en is
hierdie gemeenskappe van die weiniges in die Noord Kaap wat werklik voordeel
kon put uit die Wêreldbeker-Sokkertoernooi wat volgende maand aangebied gaan
word.
Kalbas produksie is baie arbeid intensief en gedurende Mei-maand is dit
natuurlik ook die tyd wat die kalbasse wat verlede jaar geplant is deur
werkers geoes en op droogbane uitgepak word om te droog, voordat dit verder
verwerk word.
Daar heers tans groot opgewondenheid by die personeel van "Calabash" oor
hierdie jaar se kalbasoes. Saad van 'n nuwe kalbaskultivar wat van die
buiteland bekom is, is vir die eerste keer hierdie groeiseisoen geplant. Die
kalbasplante is aan draadheinings opgelei om te verseker dat die nekke van
die kalbasse reguit groei. Die bestuur het 'n behoefte in die mark
geïdentifiseer en glo daar behoort 'n afset vir so 'n produk te wees. Sover
vasgestel kan word is dit die eerste keer dat hierdie stelsel in die praktyk
by kalbasverbouing toegepas word.
